Ноокатта 2024-жылдагы аудитте 123,16 млн сомдук каржы бузуулар аныкталды
КРнын Эсептөө палатасынын Ноокат районундагы жергиликтүү өз алдынча башкаруу органдары жана муниципалдык ишканалары боюнча 2024-жылга карата аудит жүргүздү. Бул тууралуу Эсептөө палатасынын маалымат кызматынан билдиришти.
Жүргүзүлгөн шайкештик аудиттин жыйынтыгында жалпы 123,16 млн сомдук каржы бузуулар аныкталды. Алардын ичинен 115,09 млн сомду калыбына келтирүүгө тийиш, анын 110,0 млн сому (бюджет боюнча 0,84 млн сом, бухгалтердик эсеп боюнча 109,16 млн сом) кайрадан кайтарылды. Калган 5,09 млн сом калыбына келтирилген жок.
Аудитте негизги бузуулар катары эмгек акы төлөмдөрү, негизги каражаттарды эсепке алуу, курулуш иштеринин наркы жана көлөмү боюнча ашыкча чыгымдар, ошондой эле бюджеттик милдеттүү төлөмдөрдүн өз убагында жүргүзүлбөгөнү аныкталды. Кээ бир курулуш объектилериндеги ашыкча чыгымдар жана аткарылбаган иштер боюнча материалдар УКМКга жөнөтүлгөн.
Аудиттин жыйынтыгы боюнча Ноокат районунун мамлекеттик администрациясына жана айылдык/шаардык жетекчилерге сунуштамалар жана жазма буйруктар жөнөтүлдү, ошондой эле жергиликтүү Кеңештерде отчеттор кароого алына турганы маалымдалды.
