Он айда өлкөнүн ИДПсы 10%га өсүп, 1,43 трлн сомду түздү

2025-жылдын январь-октябрь айларында Кыргызстандын ички дүң продукту (ИДП) мурунку жылдын ушул мезгилине салыштырмалуу 10,0%га жогорулап, 1 427,4 млрд сомду түздү. Бул тууралуу Улуттук статистикалык комитеттен билдиришти.

ИДПнын өсүшү негизинен товар өндүрүү, кызмат көрсөтүү тармактары жана продукттарга болгон таза салыктар аркылуу камсыз болду. Тактап айтканда:

• Товар өндүрүү тармактарынын өсүшү 11,3%га,
• Кызмат көрсөтүү тармактарынын өсүшү 8,8%га,
• Продуктарга болгон таза салыктар 10,8%га жогорулады.

ИДПнын түзүмүндө эң чоң үлүш (49,6%) кызмат көрсөтүү тармактарына туура келди, бирок бул көрсөткүч өткөн жылга салыштырмалуу 1,3 пайыздык пунктка төмөндөдү. Товар өндүрүү тармактарынын үлүшү 35,4%га жетип, 1,8 пайыздык пунктка өстү. Анын ичинде:

• Курулуш тармагынын үлүшү 1,2%дык пунктка өстү,
• Өнөр жай тармагынын үлүшү 1,0%дык пунктка өстү,
• Айыл чарбасынын үлүшү 0,4%дык пунктка төмөндөдү.

Эксперттер белгилешкендей, ИДПга алдын-ала баа берүү экономиканын өнүгүү тенденциясын баалоого жардам берет жана негизги тармактар — айыл чарба, өнөр жай, курулуш, соода, мейманканалар жана ресторандар, транспорт жана байланыш тармактары боюнча өндүрүш индекстерине негизделет.

Ички дүң продукттун түзүмүндөгү бул көрсөткүчтөр болжол менен өлкөнүн экономикалык активдүүлүгүнүн 55%ын камтыйт.