Экономика министрлиги тигүү тармагын өнүктүрүүнү талкуулады
Экономика жана коммерция министрлигинде кыргыз тигүү продукциясынын Россия Федерациясынын рыногу аркылуу жеткиликтүүлүгүн жана тармакты колдоо чараларын талкуулаган ведомстволор аралык жолугушуу болуп өттү. Бул тууралуу министрликтин маалымат кызматынан билдиришти.
Жолугушууда Россиянын ыйгарым укуктуу органдары тарабынан көзөмөлдүн күчөтүлүшү натыйжасында келип чыккан актуалдуу маселелер каралды. Ошондой эле, ички рынокту жана тышкы экономикалык ишмердүүлүктү колдоо боюнча аракеттер талкууланып, продукциянын сапатынын заманбап стандарттарын киргизүү, кадрларды даярдоо программаларын кеңейтүү жана инфраструктураны модернизациялоо маселелери каралды.
Бизнес өкүлдөрү тармактагы тоскоолдуктарды белгилеп, аларды жоюуга жана министрлик менен кызматташууга даяр экенин билдиришти. Жыйынтыгында министрликке тигүү өнөр жайын өнүктүрүүгө жана ишкердик үчүн жагымдуу шарттарды түзүүгө багытталган сунуштардын комплекси иштелип чыгууга тапшырма берилди.
Экономика жана коммерция министри Бакыт Сыдыков секторду узак мөөнөттүү өнүктүрүүгө багытталган чечимдерди бизнес-коомчулук менен системалуу иштөө аркылуу ишке ашырууну улантарын билдирди.
