Финансы министрлигинин мамлекеттик сатып алуулар электрондук порталында кемчиликтер аныкталды
КРнын Эсептөө палатасы 2024-жылдын 1-январынан 31-декабрына чейинки мезгил аралыгында КРнын Финансы министрлигиндеги мамлекеттик сатып алуулардын электрондук веб-порталынын ишине натыйжалуулук жана пилоттук маалыматтык технологиялар аудитин жүргүзгөн. Анын жыйынтыгы боюнча порталдын ишинде координациянын, көзөмөлдүн жана маалыматтык коопсуздуктун жетишсиздигинен улам бир катар кемчиликтер бар экенин аудит аныктаган.
КРнын Финансы министрлигине караштуу Мамлекеттик сатып алуулар департаменти, анын алдындагы “Сатып алуулар борбору” мамлекеттик мекемеси жана “Инфосистемс” мамлекеттик ишканасынын ортосундагы өз ара аракеттенүү тартиби жетиштүү деңгээлде жолго коюлбаганын аудит көрсөттү. Маалыматтык технологиялар тармагындагы адистердин тартыштыгы да терс таасирин тийгизип, маалыматтык коопсуздук боюнча кемчиликтер байкалган.
Эсептөө палатасынын билдирүүсүнө караганда, колдонуучулардын укуктарын башкаруу жетишсиз, айрым кызматкерлерге негизсиз кеңири мүмкүнчүлүктөр берилген. Тармактар жана серверлер жетиштүү корголбогон. Порталдын үзгүлтүксүз ишин камсыздоо жана кырсыктан калыбына келтирүү боюнча план системалуу түрдө тестирленбеген.
Мындан тышкары, “Сатып алуулар борбору” мамлекеттик мекемеси бир булактан сатып алуу ыкмасын колдонууда бааларга мониторинг жүргүзүү талабын аткарбагандыктан, айрым келишимдер атаандаштыксыз түзүлгөн.
Жогорудагыларга байланыштуу, маалыматтык технологияларды башкарууну күчөтүү, коопсуздукту жана интеграцияны жакшыртуу мамлекеттик сатып алуулар системасынын ишенимдүүлүгүн жана ачыктыгын арттыруу жөнүндө сунуштамалар берилген.
