Кыргызстандын тышкы соодасы 9 айда 8,3%га кыскарды

2025-жылдын январь-сентябрь айларында Кыргызстаннын тышкы соода жүгүртүүсү 11,3 млрд АКШ долларын түзүп, 2024-жылдын тийиштүү мезгилине салыштырмалуу 8,3%га азайды. Соода жүгүртүүнүн түзүмүндө экспорттун үлүшү 18,9%, импорттун үлүшү 81,1% болуп белгиленди. Бул тууралуу Экономика жана коммерция министрлигинен билдиришти.

Тышкы жана өз ара сооданын төмөндөшү экспорттун да, импорттун да азайышы менен байланыштуу. Экспорт көлөмү 25,7%га кыскарып, 2,1 млрд долларды түздү. Экспорттун азайышына негизинен тирүү жаныбарлар, бут кийим, жез сыныктары, кара металлдар, алтын жана текстиль продукцияларын чет өлкөгө жөнөтүүнүн төмөндөшү себеп болду. Ошол эле учурда баалуу металлдардын рудалары, таш көмүр, пластмасса жана лигнит экспорту өсүүдө.

Импорттун көлөмү да 3%га азайып, 9,1 млрд долларга түштү. Импорттун кыскарышы автомобилдердин, тиричилик техникасынын, механикалык жабдуулардын аз кириши менен түшүндүрүлөт. Бирок айрым товарлар боюнча импорт тескерисинче өстү: жашылча-жемиш, резина жана жыгачтан жасалган буюмдар, электр жабдуулары, суусундуктар, тамеки, пластмасса, химиялык жиптер жана газ.

ЕАЭБ өлкөлөрү менен соода жүгүртүүсү 3,8 млрд долларды түзүп, 5,3%га азайды. Алардын ичинде экспорт 39,2%га кыскарып, импорт 11,8%га өсүп, 3 млрд долларга жетти. Өз ара сооданын эң чоң үлүшү салттуу түрдө Россияга (65,8%) жана Казакстанга (31,8%) туура келди.

Ал эми үчүнчү өлкөлөр менен соода жүгүртүүсү 7,4 млрд долларды түзүп, жылдык базага салыштырмалуу 9,8%га төмөндөдү.