2026-жылы Салык кызматынын миң кызматкери ишинен кыскарат
"2026-жылдын май айында Салык кызматынын инспекторлорунун штаты кыскартыла баштайт, анткени контролдук функциялар атайын тутумга өтөт. Биринчи этапта 500 кызматкер, жарым жылдан кийин дагы 500 кызматкер кыскартылат. Азыр бул кызматта 3 400 салык кызматкери бар."
Мындай билдирүүнү, Салык кызматынын төргасы Алмамбет Шыкмаматов жарыялады. Анын айтымында мындай масштабдуу кыскартуу контролдун азайышына алып келбейт. Тескерисинче, бул кыйла натыйжалуу жана коррупциясыз тутумга карай кадам таштап, инспектордун ордуна так, ачык-айкын жана эч кандай кийлигишүү мүмкүнчүлүгүсүз иштей турган санариптик модуль киргизилет.
“Реформалоонун жыйынтыгында Салык кызматы иштеги жазалоочу моделден толугу менен кетип, бизнес жана жарандар үчүн толук кандуу сервиске айланышына умтулабыз. Анткени мамлекеттин башкы милдети – айып салуу эмес, ишкерлерге өз милдеттенмелерин жөнөкөй, ачык-айкын жана ашыкча чыгымдарсыз аткарууга жардам берүү. Мындай кадам ишенимди арттырып, салыктарды ыктыярдуу төлөөгө түрткү берип, туруктуу жана бекем экономикалык чөйрөнү түзөт” – деп билдирди Шыкмаматов.
Анын айтымында бардык реформалар бизнести, өзгөчө чакан жана орто бизнести өнүктүрүүгө дем берүүнү эске алуу менен жүргүзүлүүдө. Бүгүнкү күндө Кыргызстанда ишкердикти өнүктүрүү үчүн бардык жеңилдетилген жана ыңгайлуу шарттар бар.
