Кыргызстан 2030-жылга чейин ИДПны 4 500 долларга жеткирүүнү пландап жатат
Бүгүн, 19-ноябрда Бишкекте Борбор Азия регионалдык экономикалык кызматташтыгынын (БАРЭК) бизнес-форумунун экинчи күнүндө экономика жана коммерция министри Бакыт Сыдыков өлкөнүн 2030-жылга чейинки Улуттук өнүктүрүү программасын жана инвестициялык мүмкүнчүлүктөрүн тааныштырды. Бул тууралуу Экономика жана коммерция министрлигинен билдиришти.
Министрдин айтымында, акыркы үч жылда Кыргызстан экономикасы орточо жылдык 9% өсүш менен туруктуу өнүгүү жолуна түштү. Ички дүң продукт 2022-жылдан 2024-жылга чейин 1 020,7 млрд сомдон 1 523,2 млрд сомго чейин өстү. Бул өсүш негизинен 23 млрд долларга жакын тартылган инвестициялардын эсебинен камсыздалды, анын ичинде 3,7 млрд доллар түз чет өлкөлүк инвестициялар.
Сыдыков ошондой эле өлкөнүн 2030-жылга чейинки Улуттук өнүктүрүү программасынын негизги максаттарын жана приоритеттерин белгиледи. Экономикалык өсүштү жылына кеминде 8% камсыздоо, киши башына ИДПны 4 500 долларга чейин жеткирүү, адам капиталын өнүктүрүү, билим жана саламаттык сактоонун сапатын жакшыртуу, кичи жана орто бизнести колдоо, жумушсуздукту 5%га чейин азайтуу.
Министр экономикалык өсүштүн негизги булактары катары индустриализация, айыл чарба жана туризмди өнүктүрүү, регионалдык логистикалык хабды түзүү жана жашыл энергетиканы көрсөткөн. Ошондой эле өнөр жай өндүрүшүнүн көлөмүн эки эсе көбөйтүү жана негизги капиталга инвестициялардын үлүшүн 50%га жеткирүү максаты коюлду.
Бакыт Сыдыков белгилегендей, экспорттук потенциалды жогорулатуу жана жаңы жумуш орундарын түзүү үчүн машина куруу, фармацевтика, жеңил өнөр жай жана курулуш материалдары тармактарын өнүктүрүү пландалууда.
