Кыргызстан логистикалык хаб катары Борбор Азияда өз ордун бекемдейт
Бүгүн, Бишкек шаарында Борбор Азия регионалдык экономикалык кызматташтык (БАРЭК) бизнес-форумунун экинчи күнү өтүп жатат. Бул тууралуу Экономика жана коммерция министрлигинен билдиришти.
Экономика жана коммерция министри Бакыт Сыдыков "Регионалдык логистикалык хаб – Кыргыз Республикасы көңүл борборунда" сессиясын алып барды. Ал логистикалык хабды өнүктүрүүнү 2030-жылга чейин Улуттук программаны ишке ашыруунун негизги багыттарынын бири деп атады.
Министрдин айтымында, 2024-жылы транспорт секторуна 200 миллион АКШ долларлык инвестиция салынган, бирок тармакты толук өнүктүрүү үчүн кошумча 1,65 миллиард доллар зарыл. Автоунаа транспорту аркылуу жүк жүгүртүүсү акыркы төрт жылда 26 миллион тоннанын ордуна 44 миллион тоннага чейин өсүп, 82%га көбөйгөн. Министр 2030-жылга чейин жалпы жүк ташууну жылына кеминде 110 миллион тоннага жеткирүүнү максат кылышканын билдирди.
Сыдыков логистикалык системанын интеграциясын баса белгилеп, темир жолдун жыл сайын 2–3 миллион тонна жүк ташып, резервге ээ экенин, Манас жана Ош аэропортторундагы жүк ташуунун көлөмү акыркы төрт жылда 12 эсеге өскөнүн айтты. Учурда авиацияны өнүктүрүү багытында Жалал-Абаддагы жаңы эл аралык аэропорт курулуп, Манас жана Тамчы аэропорттору модернизацияланууда.
Министр логистикалык коридорлорду диверсификациялоо жана мультимодалдык ташууларды өнүктүрүүнү Кыргызстандын геостратегиялык артыкчылыктарын ишке ашыруунун маанилүү кадамы деп атап, инвесторлор үчүн чоң мүмкүнчүлүктөр ачыларын белгиледи.
