Кыргызстан менен Азия өнүктүрүү банкы өнөктөштүктү кеңейтет
Бүгүн Финансы министрлигинде министр Алмаз Бакетаев Азия өнүктүрүү банкынын (АӨБ) Президенти Масато Канда баштаган делегация менен жолугушту. Бул тууралуу Финансы министрлигинен билдиришти.
Тараптар Кыргыз Республикасы үчүн АӨБ сунуштап жаткан жаңы финансылык шарттарды карап чыгып, келечектеги кызматташтыктын стратегикалык багыттарын талкуулашты.
Жолугушууда министр А.К.Бакетаевдин демилгелери боюнча өзгөчө көңүл Борбордук Азиялык кепилдик фондун түзүү маселесине бурулду. Өлкөдө офиси жайгаша турган бул фонд аймактагы финансылык туруктуулукту бекемдөөгө багытталган маанилүү инструмент катары белгиленди.
Иш-чаранын соңунда эки тарап бири-бирине ыраазычылык билдирип, кызматташтыкты мындан ары да туруктуу жана өз ара пайдалуу негизде улантууга даяр экендиктерин билдиришти.
