Курулуш компанияладын жетекчилерине акы төлөнүүчү кызматтар тууралуу кабарланды

Кыргыз Республикасынын Курулуш, архитектура жана турак жай-коммуналдык чарба министри Нурдан Орунтаев Кыргызстандагы 100дөн ашык курулуш компанияларынын жетекчилери менен жолукту. Бул тууралуу аталган министрликтин басма сөз кызматынан кабарлашты.

Анын жүрүшүндө Министрлер Кабинетинин 2025-жылдын 2-июлунда чыккан №393 токтомун ишке ашыруу жана ага киргизилген өзгөртүүлөр боюнча түшүндүрмө берилди.

Тагыраагы  “Мамлекеттик архитектуралык-курулуштук көзөмөл жүргүзүүнүн тартиби жөнүндөгү жобого” толуктоолор киргизилген. Мындан ары курулуп жаткан объекттердин реестрине капиталдык курулуш, реконструкциялоо, имараттарды кайра профилдештирүү жана кайра пландоо объекттерин киргизүү (республикалык жана жергиликтүү бюджеттин эсебинен каржылануучу объекттерден тышкары) акы төлөнүүчү негизде жүзөгө ашырылат.

Ал эми төлөмдүн өлчөмү жана тартиби КРнын ченемдик укуктук актыларына ылайык белгиленет.

Акы төлөнүүчү кызматтарды киргизүүнүн негизги максаттары:

• Объекттерди каттоонун бирдиктүү механизмин түзүү

• Курулуш сапатын жана коопсуздукту жогорулатуу

• Курулуп жаткан объекттердин реестрин бир калыпта түзүү

• Курулуш процессинде туруктуу мамлекеттик көзөмөлдү камсыз кылуу

• Коррупциялык тобокелдиктерди азайтуу

Министр өз сөзүндө бул өзгөртүүлөр курулуш тармагындагы тартипти чыңдоого, объектилерди каттоонун бирдиктүү механизмин түзүүгө жана курулуштун ар бир этабынын коопсуздугун камсыз кылууга багытталгандыгын белгиледи.