Таш-Көмүр шаарында 30 МВт кубаттуулуктагы күн электр станциясы курула баштады
Таш-Көмүр шаарында 11 гектар жерге 30 МВт кубаттуулуктагы күн электр станциясынын курулушу жүрүп жатканын президенттин Жалал-Абад облусундагы өкүлчүлүгүнө шилтеме кылып “Кабар” агенттиги жазды. Күн мурун президенттин өкүлү Тилек Текебаев аталган объектиге барып курулуш иштеринен кабар алган.
Эске салсак, бул Жалал-Абад облусунда алгачкы ири күн электр энергетикалык долбоорлорунун бири болуп саналат. Долбоор GRK Solar Energ компаниясы тарабынан жүзөгө ашырылып жатат. Долбоордун наркы 20 млн долларды түзөт.
Күн электр станциясы курулуп жаткан аймакта мурда көмүр шахталары жайгашкан. Учурда аталган жерлер толук калыбына келтирилип, өндүрүштүк жана коммерциялык пайдаланууга ылайыкташтырылган. Курулуш иштери экологиялык талаптар сакталган шартта, калыбына келтирилген аймактарда жүргүзүлүп жатат.
Облус башчысы Тилек Текебаев бул долбоор энергетикалык көйгөйлөрдү чечүү менен катар, социалдык-экономикалык өнүгүүгө жана экологиялык коопсуздукту камсыз кылууга багытталган комплекстүү чечим экендигин белгиледи.
