Быйыл Кыргызстанда калемпир, сабиздин түшүмдүүлүгү жакшы болгон

Кыргызстанда 2025-жылдагы түшүм жыйноо иштери дээрлик  98–99%га аяктаганын радио эфиринде Суу ресурстары, айыл чарба жана кайра иштетүү өнөр жайы министрлигинин өсүмдүк өстүрүү, багбанчылык жана кооперация башкармалыгынын начальниги Турат Идирисов билдирди.

Анын айтымында, быйылкы сезон аптаптуу ысык жана кургакчылык менен коштолуп, айрыкча кайракы жерлерге олуттуу таасирин тийгизген. Буудай жана арпанын түшүмдүүлүгү өткөн жылга салыштырмалуу төмөндөгөн, бирок башка көпчүлүк өсүмдүктөр боюнча көрсөткүчтөр туруктуу бойдон калган.

Идирисовдун айтуусунда, бир катар жашылча жана мөмө-жемиштер боюнча жакшы жыйынтыктар алынган.

• Талас облусунда калемпирдин түшүмдүүлүгү гектарынан 25 тоннага жеткен;
• Чүй облусунда сабиздин түшүмдүүлүгү 70–73 центнерге, айрым чарбаларда 90 центнерге чейин жеткен;
• Нарын облусунда картошканын түшүмдүүлүгү 35–40 центнер болгон.

Министрликтин маалыматына караганда, шекер кызылчасынын жыйымы аяктап баратат жана быйыл бир гектардан 380–450 центнерден алынган. Бул көрсөткүч өткөн жылга караганда төмөн. Себеби быйыл айрым жерлердеги кант кызылчалары жазгы үшүккө урунган. Бирок Идирисов белгилегендей, өлкө кумшекер кору жана жаңы түшүм эсебинен шекер менен толук камсыздалат.

Башкармалыктын жетекчиси "3+2" пилоттук долбоору кеңейип жатканын да кошумчалады. Анын алкагында министрликтин адистери дыйкандарды үрөн себүүдөн тартып түшүм жыйноого чейин консультациялык жана техникалык колдоо менен коштоп турушат.