Кыргызстандын сейсмикалык кооптуу аймактарында 18 кабаттан жогорку үйлөр курулат
Кыргызстанда сейсмикалык кооптуу аймактарда 18 кабаттан жогору имараттарды куруу үчүн шарттар иштелип чыкканын Архитектура, курулуш жана турак жай-коммуналдык чарба министри Нурдан Орунтаев билдирди.
Анын айтымында, Курулуш министрлиги илимий уюмдар, анын ичинде министрликтин карамагындагы курулуштун сейсмикалык туруктуулугу боюнча профилдик институт кызматташат.
"Буга чейин өлкөдө көп кабаттуу курулуш, негизинен, 9–10 кабат менен чектелип келген. Азыркы учурда институт бардык сейсмостойкалык талаптар сакталган шартта 18 кабаттан жогору имараттарды куруу үчүн техникалык шарттарды иштеп берип жатат. Уруксат берүүдөн мурун комплекстүү инженердик жана илимий изилдөөлөр жүргүзүлөт", – дейт министр.
Нурдан Орунтаевдин айтымында, сейсмикалык кооптуу аймактарда көп кабаттуу үйлөрдү куруу — дүйнөлүк тажрыйбада бар. Мисал катары ал Алматы, Ташкент, Душанбе жана Үрүмчү шаарларын келтирди. Бул шаарлар 8–9 баллдык сейсмикалык зонада жайгашканына карабастан, бийик имараттар кеңири курулган. Тактап айтканда, Ташкент шаарында 50 кабаттан ашкан имараттар пайдаланууга берилген, ал эми Кытайдын Үрүмчү шаарында бийиктиги болжол менен 266 метр болгон асман тиреген имарат курулган.
"Кыргызстанда азыркы учурда эң бийик объект — 27 кабаттуу имарат, анын курулушу аяктоо баскычында турат. Ошол эле учурда 35 кабатка чейинки имараттарды курууга уруксаттар берилген жана мындай объектилер учурда курулуп жатат", – деп билдирди министр.
Мындан тышкары, азыр 40 кабатка чейинки имараттар үчүн нормативдик талаптар иштелип чыккан, жана министрлик тиешелүү уруксаттарды берүү мүмкүнчүлүгүн карап жатат.
