Келечекте Бишкекте кошумча 2 миң 416 гектар парк, сквер, сейил багы түзүлөт
Бишкек шаарында борбор калаанын 2050-жылга чейинки жаңы Башкы планынын негизги параметрлери тааныштырылды.
Учурда шаардагы иштеп жаткан жашыл зоналардын аянты 606 гектарды түзөт. Жаңы Башкы планга ылайык, кошумча 2 миң 416 гектар парк, сквер, бак жана бульварларды түзүү каралган. Натыйжада жашыл аймактардын жалпы аянты 3 миң 22 гектарга жетип, дээрлик беш эсеге көбөйөт.
"Бишкекбашкыархитектура" МИнин башчысынын орун басары Азирет Акимовдун айтымында, коомдук угуулар 24–25-декабрда өтөт. Андан кийин иштеп чыгуучулар жана комиссия бардык эскертүүлөрдү карап чыгып, аларды кабыл алуу же четке кагуу боюнча чечим чыгарышат. Угуунун протоколдору беш күндүн ичинде жарыяланат. Андан соң шаардыктар жети күндүн ичинде кошумча сунуштарды киргизе алышат. Ошондон кийин долбоор мамлекеттик органдарга макулдашууга, андан соң Министрлер Кабинетине жөнөтүлөт. Мэриянын эсептөөсү боюнча, бул процесс январдын ортосуна чейин аяктайт.
Ошол эле учурда талкуу сын-пикирлер менен коштолду. Санкт-Петербург шаарындагы илимий-изилдөө институтунун архитектору, долбоордун авторлорунун бири Ирина Гришечкина Бишкектеги азыркы курулуш саясатына катуу сын айтты.
"Бишкек 3–4 кабаттуу уникалдуу объекттерин жоготуп жатат. Мен жеке өзүм 12 кабаттан жогору үйлөрдүн курулушуна каршымын. Шаар мындай жүктү көтөрө албайт. Инвестициялык жарышты токтотуу керек", — деди ал.
Маданияттын эмгек сиңирген ишмери Леонид Бухман тарыхый борборду, анын ичинде сталин доорундагы имараттарды сактоо маселесин көтөрүп, Бишкекти Санкт-Петербург менен салыштырды. Ал жакта тарыхый келбет кылдат корголорун белгиледи. Илимий-изилдөө институтунун өкүлү Бишкектин борборундагы сталиндик имараттар сакталарына ишендирди.
