"Чатыр-Көл" кинотеатрынын имараты Бишкек мэриясынын карамагына өткөрүлдү
МинКаб Мамлекеттик мүлктү башкаруу агенттигине, Маданият, маалымат жана жаштар саясаты министрлигине борбордогу "Чатыр-Көл" кинотеатрынын имаратын 40 сотых жери менен кошо мэриянын менчигине өткөрүп берүүнү тапшырды.
Министрлер кабинетинин токтомунда кинотеатрдын ордуна балдар жана кары-картаңдар үчүн кызмат кылуучу социалдык мекеме тургузулары жазылган. Чечим элдин жашоосун жакшыртуу, балдарга жана улгайган адамдарга жеткиликтүү социалдык кызмат көрсөтүү максатында кабыл алынганы кабарланды.
“Чатыр-Көл” кинотеатры 1967-жылы курулган.
Мыйзамсыз менчиктештирилгени айтылган кинотеатр 2010-жылы мамлекеттин карамагына алынып, “Учур” театрына берилген. 2012-жылы Бишкектин менчигинен алынып, ал кездеги Маданият жана туризм министрлигине өткөрүлүп берилген.
Оңдоп-түзөө иштери жүргүзүлбөгөн имаратта бир нече жолу өрт чыккан. Акыркы жолу былтыр ноябрь айында күйүп кеткен соң, мэрия аны өз карамагына алары белгилүү болгон.
