Кыргызстанда ыкчам төлөм системасы киргизилет
Жакынкы убакта Кыргызстанда тез төлөмдөр системасы ишке киргизилерин Россия-Кыргыз өнүктүрүү фонду уюштурган ишкердик жолугушууда Улуттук банк төрагасынын орун басары Медет Таиров билдирди.
Анын айтымында, учурда финансылык кызматтардын жеткиликтүүлүгүн, ылдамдыгын жана коопсуздугун жогорулатуу боюнча иштер жүргүзүлүүдө.
"Тез төлөмдөр системасы ар кайсы банктардын кардарларынын эсептеринин ортосунда каражатты заматта которууга мүмкүнчүлүк берет. Пилоттук долбоорду ушул кварталда ишке киргизебиз", — деди Улуттук банктын өкүлү.
Медет Таиров ошондой эле экономиканын ыкчам өсүшүнүн шартында өлкөнүн банк сектору туруктуулукту көрсөтүп жатканын белгиледи.
Бүгүнкү күндө өлкөдө 24 коммерциялык банк иш алып барат. Банк тутумунун жалпы активдери 1,2 трлн сомдон ашат, ал эми насыя портфели 500 млрд сомдон жогору. Депозиттик база өсүүсүн улантып, калктын жана бизнестин ишенимин тастыктоодо.
"Биздин милдет — инновацияларды өнүктүрүү менен бирге системанын туруктуулугун сактоо. Запастык мүмкүнчүлүктөр банктарга тышкы чакырыктарга ишенимдүү жооп берүүгө шарт түзөт", — деди ал.
Ошондой эле ал Кыргызстанда ELQR технологиясы — QR-төлөмдөрдүн бирдиктүү улуттук стандарты — киргизилгенин эске салды. Бул система толук кросс-платформалуу болуп, каалаган банктын тиркемеси же электрондук капчык аркылуу төлөм жүргүзүүгө мүмкүнчүлүк берет.
