Испания компаниясы күн электр станциясын курууга кызыкдар
Инвестициялар боюнча улуттук агенттигинде Solartec World Company S.L.компаниясынын өкүлдөрү менен жолугушуу болуп, анда Кыргызстанда инвестициялык долбоорлорду ишке ашыруунун келечеги талкууланды.
Анын ичинде күн электр энергиясын өндүрүү үчүн фотоэлектрдик панелдерди орнотуу, ошондой эле эркин экономикалык аймакта тез тургузулуучу жана экологиялык жактан таза үйлөрдү чыгаруучу комбинат куруу маселелери каралды.
Өзгөчө кайра жаралуучу энергия булактары тармагына заманбап технологияларды киргизүү, "жашыл" экономиканы өнүктүрүү, жаңы жумуш орундарын түзүү жана курулуш материалдарын өндүрүүнү аймакташтыруу маселелерине көңүл бурулду. Компания өкүлдөрү өздөрүнүн технологиялык чечимдерин тааныштырып, Кыргызстан менен узак мөөнөттүү кызматташууга кызыкдар экенин билдиришти.
Сүйлөшүүлөрдүн жыйынтыгында тараптар долбоорлорду ишке ашыруунун кийинки кадамдарын талкуулашты. Алардын катарына техникалык параметрлерди иштеп чыгуу, объектилерди жайгаштыруу үчүн ылайыктуу аянттарды аныктоо жана инвестициялык келишимдин долбоорун даярдоону баштоо кирет.
