Д.Трамп "Тынчтык кеңеши" Газаны калыбына келтирүүгө 5 млрд доллар бөлөрүн билдирди
АКШ президенти Дональд Трамп жаңы түзүлгөн "Тынчтык кеңешинин" (Board of Peace) мүчөлөрү согуштан кыйраган Газаны калыбына келтирүүгө 5 млрд доллар бөлүүгө убада беришкенин билдирди.
Ал кайсы өлкөлөр калыбына келтирүү үчүн каражат бөлөрүн же кайсы мамлекеттер Газадагы кырдаалды турукташтыруу максатында аскер жөнөтөрүн тактаган жок.
Индонезиянын бийлиги 15-февралда Газага гуманитардык жана тынчтык миссиясынын алкагында сегиз миңге чейин аскер жөнөтүлүшү мүмкүн экенин маалымдаган.
БУУ, Дүйнөлүк банк жана Евробиримдиктин эсебинде аймакты толук калыбына келтирүү үчүн 70 млрд доллар талап кылынат. Израилдин эки жылдан ашуун убакытка созулган бомбалоосунан кийин Газа тилкесинде дээрлик бардыгы талкаланган.
"Тынчтык кеңешинин" 20дан ашуун мүчөсүнүн канчасы алгачкы жыйынга катышары белгисиз. Башында бул кеңеш Газадагы согушту токтотууга багытталган механизм катары каралган. Бирок бара-бара ал Трамптын дүйнөлүк кризистерди чечүүгө багытталган кеңири амбициясынын бир бөлүгүнө айланды.
АКШнын Европадагы жана башка аймактардагы көптөгөн өнөктөштөрү бул түзүмдү БУУнун Коопсуздук кеңешине атаандаш органга айланып кетиши мүмкүн деп кооптонуп, кошулуудан баш тартышкан.
"Тынчтык кеңешине" Борбор Азиядан Казакстан менен Өзбекстандын лидерлери чакырылган.
