Финансы министрлигинин гранттары Чүй облусундагы долбоорлорду 192 млн сомго каржылаган
2025-жылы Финансы министрлиги тарабынан бөлүнгөн стимулдаштыруучу (үлүштүк) гранттардын эсебинен жергиликтүү өз алдынча башкаруу органдары жалпы суммасы 365 млн 872 миң сомду түзгөн 89 долбоорду ишке ашырган.
Бул тууралуу бүгүн Чүй облусу боюнча президенттин ыйгарым укуктуу өкүлүнүн биринчи орун басары Санжар Жантаев 2026-жылга карата Чүй облусунун социалдык-экономикалык өнүгүү маселелерине арналган коллегиянын жыйынында билдирди.
Анын маалыматына ылайык, жалпы сумманын ичинен:
- 191 млн 879 миң сом — гранттык каражаттар;
- 173 млн 993 миң сом — айыл өкмөттөрүнүн өздүк салымы.
"Биз инвесторлордун келишин күтпөстөн, жаңы инвестициялык долбоорлорду өзүбүз демилгелеп жатабыз", — деди Жантаев.
Ошондой эле ал Чүй облусунун эл аралык кызматташтыгынын негизги максаттары — соода-экономикалык, илимий-техникалык, социалдык жана маданий тармактарда алдыңкы чет өлкөлүк аймактар менен тажрыйба алмашуу, ошондой эле облустун инвестициялык потенциалын жогорулатуу экенин белгиледи.
Анын айтымында, облус Ленинград облусу (Россия Федерациясы), Кытайдын Шаньдун, Шаньси, Ганьсу жана Синьцзян провинциялары, ошондой эле башка чет өлкөлүк аймактар менен тыгыз кызматташтык жүргүзүүдө.
