Парламент альтернативдик кызмат өтөө баалары боюнча мыйзам долбоорун II окууда кабыл алды
Жогорку Кеңеш экинчи окууда "Айрым мыйзам актыларына өзгөртүүлөрдү киргизүү жөнүндө (Салыктык эмес кирешелер кодексине, Укук бузуулар жөнүндө кодекске, “Жарандардын жалпы аскердик милдети, аскердик жана альтернативдик кызматтар жөнүндө” мыйзамына)" мыйзам долбоорун карап, кабыл алды.
Долбоордо аскердик эсепке алуу эрежелерин бузгандыгы үчүн жоопкерчиликти күчөтүү каралган. Айып пулду 10 эсептик көрсөткүчтөн 100 эсептик көрсөткүчкө чейин (1000 сомдон 10 000 сомго чейин) көбөйтүү пландалып жатат.
Буга чейин Жогорку Кеңештин комитет жыйынында коргоо министринин биринчи орун басары Тариэль Отонбаев 22 жаштан 40 жашка чейинки мөөнөттүү аскердик кызмат өтөбөгөн жарандар, ошондой эле мобилизациялык резерв жыйымдарына катышуунун ордуна альтернативдик кызмат өтөөнү каалагандар үчүн акчалай төлөмдү 75 000 сомго чейин белгилөө сунушталып жатканын билдирген.
Мыйзам долбоорунда төмөнкү категориядагы жарандар үчүн да төлөмдөрдү көбөйтүү каралган:
- 30 жашка чейинки, биринчи категориядагы запаска аскердик эсепте турган, жогорку билимдүү жана биринчи офицердик наамды алуу менен запастагы офицерлерди даярдоо программасы боюнча мобилизациялык резерв жыйымдарынан өтүүнү каалаган аскер милдеттүүлөр — 700 эсептик көрсөткүчтөн (70 миң сом) 900 эсептик көрсөткүчкө (90 миң сом) чейин;
- үй-бүлөлүк жагдайына байланыштуу чакырылган жарандар — 180 эсептик көрсөткүчтөн (18 миң сом) 250 эсептик көрсөткүчкө (25 миң сом) чейин;
- ден соолугунун абалына байланыштуу чектөөлөр менен чакырылган жарандар — 250 эсептик көрсөткүчтөн (25 миң сом) 400 эсептик көрсөткүчкө (40 миң сом) чейин;
- курал көтөрүүгө жана Куралдуу күчтөрдө кызмат өтөөгө жол бербеген ишенимди карманган катталган диний уюмдардын мүчөлөрү, ошондой эле коомго пайдалуу иштерди (кызмат өтөө мөөнөтү ичинде 48 саат) аткарууну каалаган жарандар — 250 эсептик көрсөткүчтөн (25 миң сом) 500 эсептик көрсөткүчкө (50 миң сом) чейин.
