Батыш, Чыгыш, Түштүк ЧЧКлары бетондолот
"Агродиалог" форумунда Бакыт Төрөбаев дыйканчылыктын өздүк наркын төмөндөтүү жана суунун жоготууларын азайтуу максатында Чоң Чүй каналдарын этап-этабы менен бетон менен каптоо пландалып жатканын билдирди.
Анын айтымында, бүгүнкү күндө дүйнөлүк айыл чарба продукциясынын баалары олуттуу өзгөрүүлөргө дуушар болууда. Мисалы, фасольдун дүйнөлүк базардагы баасы 1600 доллардан 900 долларга чейин түшүп кеткен. Натыйжада сатуу баасы фермерлердин чыгымдарын жаппай калышы мүмкүн.
Төрөбаев белгилегендей, негизги багыттардын бири — айыл чарба жерлерин туруктуу жана натыйжалуу суу менен камсыз кылуу. Бул үчүн ирригациялык инфраструктураны өнүктүрүү, анын ичинде тамчылатып сугарууну киргизүү жана каналдарды модернизациялоо каралууда.
Министр өлкөдө Батыш чоң Чүй каналы, Чыгыш чоң Чүй каналы жана Түштү чоң Чүй каналы иштеп жатканын маалымдады.
Батыш Чоң Чүй каналынын узундугу 146 чакырымды түзөт, анын ичинен болгону 3,9 чакырымы бетон менен капталган. Чыгыш Чоң Чүй каналы 97 чакырымга созулуп, 10 чакырымы гана бетон менен бекемделген. Ал эми узундугу 36 чакырым болгон Түштүк Чоң Чүй каналынын 5,8 чакырымы бетон менен капталган.
"Каналдардын басымдуу бөлүгү топурактан болгондуктан, суу жоготуулары өтө чоң", — деп кошумчалады министр.
