ЖКККБ мыйзамсыз күйүүчү май ташыган 37 жолтандабасты кармады
Кыргызстанда Жол кыймылынын коопсуздугун камсыз кылуу башкы башкармалыгынын кызматкерлери атайын рейддин жүрүшүндө күйүүчү майды ташуу жана мыйзамсыз сатуу үчүн кошумча бактар мыйзамсыз орнотулган 37 автоунааны аныкташканын мекеменин басма сөз кызматы билдирди.
Кармалган унаалардын басымдуу бөлүгү — жол тандабастар. Айдоочулар кайра жабдылган автоунаалар менен күйүүчү майды Казахстандан Кыргызстанга ташып келип, андан ары автожолдордун боюнда сатышкан.
Инспекторлор автоунааларды кайра жабдуу жана пайдалануу эрежелеринин бузулушун каттап, бардык 37 унааны айып короого киргизишти.
Ар бир мыйзам бузган айдоочуга 5,5 миң сом өлчөмүндө айып пул салынды. Мекеме унааларды кайтарып берүү боюнча катуу шарт койду: ээлери мыйзамсыз орнотулган кошумча бактарды толугу менен алып салмайынча, автоунаалар атайын токтотмо жайда сакталат.
Өткөрүлгөн иш-чаралар күйүүчү-майлоочу материалдардын (КММ) мыйзамсыз соодасын токтотууга багытталган. ЖКККББ жолдордо ушундай мыйзам бузуу фактыларын аныктоо үчүн мониторингди улантууда.
