Былтыр интернет алдамчылыгы боюнча 387 кылмыштын бети ачылбай калган
Жогорку Кеңештин депутаты Улан Примов парламенттеги Финансы, бюджет, ишкердик жана атаандаштыкты өнүктүрүү боюнча комитетинин 23-февралдагы отурумунда былтыр интернет алдамчылыгы боюнча 674 кылмыш иши козголуп, анын 387синин бети ачылбай калганына көңүл бурганын "Азаттык" жазды.
Ички иштер министринин орун басары Нурбек Абдиев кылмыштардын бети ачылбай калышынын бир себеби катары социалдык тармактардан байланышкан колдонуучулардын такталбай жатышын белгиледи.
“Чет өлкөдөн туруп алып, башка мамлекеттин жарандары аркылуу жасалган кылмыштардын бетин ачуу кыйынчылык жаратууда. Кыргызстандагы кылмышкерлер болсо, аларды өзүбүздүн ыкмалар аркылуу таап, кылмыш жообуна тартып жатабыз”, - деди Абдиев.
2024-жылы IT-технологиялар чөйрөсүндө 1658 кылмыш иши козголгон. Анын ичинен 796сынын бети ачылып, калган 862 кылмыштын бети ачылган эмес.
Улуттук банк шылуундарга алданганы тууралуу жарандардан ай сайын 300дөн 500гө чейин арыз түшөрүн билдирип, сак болууну эскерткен.
