Кыргызстандагы 100 айыл өкмөтүнө жайыттарды жакшыртууга 100 миң доллар грант берилет
Кыргызстанда 100 айыл өкмөтүнө жайыттардын абалын жакшыртуу үчүн 100 миң доллардан грант берилерин Жогорку Кеңештин агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитетинин жыйынында Айыл чарба министрлигинин алдындагы Айыл чарба долбоорлорун ишке ашыруу бөлүмүнүн башчысы Тамчыбек Тулеев билдирди.
Анын айтымында, Кыргызстанда жалпысынан 230 айыл өкмөтү бар.
"Долбоордун алкагында конкурс аркылуу 100 айыл өкмөтү тандалып алынды. Алар жайыттарды натыйжалуу башкаруу үчүн 100 миң доллардан грант алышат. Ошол эле учурда мамлекет бул каражатты донорлордон насыя түрүндө алат. 100 миң доллардын 70 миңи түздөн-түз жайыттарды калыбына келтирүүгө жумшалат, ал эми 30 миңи жайыттарга түшкөн жүктү азайтуу боюнча кошумча иш-чараларга багытталат. Мисалы, малга тоют өндүрүүчү кошумча цехтерди ачууга. Эгер тоют жетиштүү болсо, мал жайытта аз убакыт болот", — деди ал.
Тамчыбек Тулеев учурда жайыттардын абалы өтө оор экенин белгиледи.
"Аларды калыбына келтирүү боюнча ыкчам чараларды көрүү зарыл. Бул багытта донорлор менен биргеликте долбоорлорду ишке ашырып жатабыз", — деп кошумчалады ал.
