Кыргызстанга Казакстандан дан экспорттоо 1,7 эсеге өстү
Кыргызстанга Казакстандан дан экспорттоо 1,7 эсеге өскөнүн "Казакстан темир жолу" улуттук компаниясы билдирди.
Такталган маалыматка ылайык, 2025-жылдын сентябрынан 2026-жылдын 19-февралына чейин тышкы рынокторго жаңы түшүмдөн 6,4 млн тонна дан экспорттолгон. Бул өткөн маркетингдик жылдын ушул мезгилине салыштырмалуу 19,7%га көп (анда 5,4 млн тонна жөнөтүлгөн).
Өсүш Борбор Азия өлкөлөрүндөгү жана башка аймактардагы салттуу рыноктор менен сооданын жанданышынын эсебинен камсыздалды.
Айрыкча Өзбекстанга жеткирүүлөр 46%га өсүп, 2 млн тоннадан 3 млн тоннага жеткен. Кыргызстанга экспорт 1,7 эсеге көбөйүп, 104 миң тоннадан 180 миң тоннага чыккан. Ал эми Афганистанга жеткирүү 1,9 эсеге өсүп, 236 миң тоннадан 466 миң тоннага жеткен.
Эксперттер белгилешкендей, экспорттун оң динамикасы казакстандык данга болгон суроо-талаптын жогору экенин жана продукциянын тышкы рыноктордогу атаандаштыкка жөндөмдүүлүгүн көрсөтөт.
