ЖК депутаты жайыт комитеттерин түзүү чоң ката болгонун билдирди
Депутат Алишер Козуев Жогорку Кеңештин агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитетинин жыйынында Суу, айыл чарба министрлигин мурда түзүлгөн жайыт комитеттерин ката чечим катары таанууга чакырды.
Анын айтымында, бир нече жыл мурда министрлик тарабынан жайыт комитеттерин түзүү чечими кабыл алынып, алардын ишмердүүлүгүнө сырттан ири каражаттар тартылган.
"Бул насыялар акырында салык төлөөчүлөрдүн мойнуна жүк болуп түштү. Натыйжада аталган уюмдан пайдага караганда зыяны көп болду. Жайыт комитеттерине каражатты мамлекет берген, ал эми бардык комитеттерди бириктирген уюм эч кимге отчёт бербеген “монстрго” айланды. Азыр Министрлер кабинети катасын түшүнүп, уюмду жоюп, анын ордуна айыл өкмөттөрүнүн алдында мамлекеттик мекемелерди түзүү чечимин кабыл алды. Бул туура кадам болду", — деди Алишер Козуев.
Өз кезегинде Кыргыз Республикасынын суу ресурстары, айыл чарба жана кайра иштетүү өнөр жайы министринин биринчи орун басары Жаныбек Керималиев жайыт комитеттери 2009-жылы мыйзамдын негизинде түзүлгөнүн белгиледи.
"Ал кезде бул демилге актуалдуу болчу, азыр болсо заман талабына жооп бербей калды. Жайыт комитеттери өзүн актаган жок, натыйжалуулугун көрсөткөн жок. Уюм бейөкмөт уюм катары иштеп, аны болгону Эсеп палатасы гана текшере алчу. Азыр бул комитеттер мамлекеттик ишканаларга айланып, түздөн-түз райондун акимдерине баш ийет. Учурда жайыттардын абалын жакшыртуу боюнча кыска жана узак мөөнөттүү долбоорлор иштелип чыгууда. Бул багытта донорлор менен биргелешкен долбоорлорду ишке ашырып жатабыз", — деди ал.
