Кыргызстан мамлекеттик ири сатып алууларга банктык коштоону киргизет
МинКаб мамлекеттик жана муниципалдык ишканалар, ошондой эле уставдык капиталында мамлекеттин үлүшү 50%дан жогору болгон компаниялар, алардын карамагындагы филиалдар үчүн келишимдерди банктык коштоо боюнча жаңы жобону бекитти.
Бул документтин максаты — сатып алуулар учурунда каражаттын пайдаланылышына көзөмөлдү күчөтүү, коррупциянын алдын алуу жана ачыктыкты жогорулатуу.
Эми мындай уюмдар өздөрүнүн ири сатып алууларын жаңы жобого жана белгиленген шарттарга ылайык милдеттүү банктык коштоо менен жүргүзүүгө тийиш. Жободо ошондой эле келишимдерди коштоого ыйгарым укуктуу банктардын тизмеси белгиленген.
Мындан тышкары, мурдагы мамлекеттик сатып алуулар тартиби туураланган: айрым пункттар алынган жана келишимдерди банк аркылуу коштоо боюнча эрежелер жаңы токтомго ылайык келтирилген.
Мамлекеттик органдар жана мамлекеттин үлүшү 50%дан жогору ишканалар бул тартипти сатып алууларында колдонуп, ыйгарым укуктуу банктар менен келишим түзүшү керек.
Андан сырткары, Мамлекеттик мүлктү башкаруу агенттиги бардык сатып алуучу уюмдарга банктык коштоонун типтүү шарттарын жеткирип берүүгө милдеттүү. Бул шарттар эми конкурс документациясына киргизилиши зарыл.
Банктык коштоо — бул мамлекеттик келишим боюнча бардык төлөмдөр ыйгарым укуктуу банк аркылуу өтө турган көзөмөл механизми. Банк каражаттын келишимге ылайык сарпталышын текшерет, бул алдамчылыктын алдын алып, сатып алууларды ачык жүргүзүүнү камсыз кылат.
