Ш.Мирзиеев жаштар ишкерлигин өнүктүрүүгө 200 млн доллар бөлүнөрүн билдирди

Өзбекстанда жаштар ишкердигин өнүктүрүүгө кошумча 200 млн доллар багытталарын президент Шавкат Мирзиёев жаштар менен жолугушууда билдирди.

Маалыматка ылайык, өз алдынча иштеген жаштар үчүн насыянын көлөмү 100 млн сумдан (8 миң доллар) 300 млн сумга чейин (24 миң доллар) көбөйтүлөт. Жаш ишкерлердин долбоорлоруна 10 млрд сумга чейин (800 миң доллар) каражат берүү каралган. Инновациялык стартаптарга 100 миң долларга чейин инвестиция салууга мүмкүнчүлүк түзүлөт.

Быйыл "Келажак тадбиркори" ("Келечек ишкери") программасы ишке кирип, жаш ишкерлерге 7 жылга чейин, жылдык 15% менен насыя берилет. Анын алкагында 20 млн сумга чейин (1,6 миң доллар) күрөөсүз насыя, ишин кеңейтүүгө 2 млрд сумга чейин (160 миң доллар), ал эми кеминде беш бүтүрүүчүнү жумушка алган ишкерлерге 10 млрд сумга чейин (800 миң доллар) каржылык колдоо көрсөтүлөт.

Ар бир аймакта жаштар бизнес-инкубаторлору ачылып, ишкерликке окутуу, бухгалтердик жана маркетингдик кеңеш берүү, рынокко чыгууга көмөк көрсөтүү кызматтары уюштурулат.

Мындан тышкары, "Янги авлод тадбиркорлари" ("Жаңы муун ишкерлери") программасы аркылуу 40 миңден ашуун жашка бизнес көндүмдөрү үйрөтүлүп, мыкты 1 миң долбоорго 200 млн сумга чейин (16 миң доллар) жеңилдетилген насыя берилет.

Ошондой эле жыл сайын "Жаш ишкерлер" сынагы өткөрүлүп, 100 мыкты долбоорду брендге айлантууга каражат бөлүнөт.