Кыргызстанда 5 жылда 2 трлн сомдук айыл чарба продукциясы өндүрүлгөн
Беш жылдын ичинде айыл чарба продукциясын өндүрүү көлөмү 2 триллион сомго чамалаганын Садыр Жапаров бүгүн "Ынтымак Ордодо" өткөн республикалык кеңешмеде билдирди.
"Өзүңүздөр билгендей, өлкө калкынын 60%ы айыл жеринде жашайт. Демек, агрардык секторду өнүктүрүү жарандардын көпчүлүгүнө түздөн-түз кам көрүү дегенди билдирет. Беш жылдын ичинде биз айыл жергесиндеги элибизди колдоону негизги артыкчылык катары карадык. Анткени айылдын өнүгүшү менен үй-бүлө өнүгүп, аймак бекемделип, бүтүндөй өлкө чыңдалат", - деди президент.
Садыр Жапаров агротармактагы иштер конкреттүү жыйынтыктарды бергенин белгиледи.
"Беш жылдын ичинде айыл чарба продукциясын өндүрүү көлөмү 2 трлн сомго чамалады. Демек, бул тармакта дагы жаңы жумуш орундары пайда болуп, айылдагы үй-бүлөлөрдүн кирешелери өсүп, аймактар менен кошо бүткүл республиканын экономикалык өз алдынчалыгы чыңдала баштаганынан кабар берет", - деди президент.
Белгилей кетсек, бүгүн "Ынтымак ордодо" президент Садыр Жапаровдун катышуусунда 2025-жылдын жыйынтыгын чыгарган республикалык кеңешме өттү.
