Ош шаарынын бюджети 2026-жылы 1,8 млрд сомго көбөйөт
Ош шаарында 2026-жылга карата жергиликтүү бюджеттин долбоору боюнча коомдук угуу өткөрүлдү. Документке ылайык, шаардын бюджети 5 млрд 205 млн сомду түзөт. Бул өткөн жылга салыштырмалуу дээрлик 1,8 млрд сомго көп экенин Ош мэриясынын басма сөз кызматы билдирди.
Коомдук угууга шаардык кеңештин төрагасы Болот Баетов, мэрдин биринчи орун басары Оморбек Төрөбаев, шаардык кеңештин депутаттары, мекеме-ишканалардын жетекчилери, МТУ жана айыл өкмөт башчылары, коомдук жана бейөкмөт уюмдардын өкүлдөрү, активисттер жана шаар тургундары катышты.
Быйылкы бюджеттин чыгаша бөлүгү жалпы мамлекеттик кызматтарга, коргонуу тармагына, экономикалык маселелерге, турак жай-коммуналдык чарбага, эс алуу, спорт жана маданият тармактарына, ошондой эле билим берүү жана социалдык коргоо тармактарына багытталат.
Жыйындын жүрүшүндө шаар тургундары жана активисттер ден соолугунан мүмкүнчүлүгү чектелген жарандар үчүн шарттарды жакшыртуу, социалдык коргоого бөлүнгөн каражатты көбөйтүү, "Алай-1" жана "Алай-2" турак жай массивдеринде инфраструктураны өнүктүрүү боюнча сунуштарын айтышты.
Мындан тышкары, айыл өкмөттөрүндөгү кош каржылоо долбоорлорун жөнөкөйлөтүү, коомдук транспорттун каттамдарын оптималдаштыруу, электр энергиясын үзгүлтүксүз камсыз кылуу, ички жолдорду оңдоо, ошондой эле түштүк борбордун экологиялык жана санитардык абалын жакшыртуу маселелери көтөрүлдү.
