Садыр Жапаров: Жыл аягына чейин 20 миң үй-бүлө үйлүү болот
2025-жыл Мамлекеттик ипотекалык компания тарабынан пайдаланууга берилген турак жайлар боюнча рекорддук жыл болгонун 27-февралдагы республикалык жыйында Садыр Жапаров билдирди.
Анын айтымында, МИК буга чейин болуп көрбөгөндөй жогорку көрсөткүчкө жетишти: 4,6 миң үй-бүлө өз батирлеринин ачкычтарын алышты. Бул акыркы төрт жылдагы жалпы көрсөткүчтүн жарымына барабар.
Президент белгилегендей, турак жайлардын көбү Бишкек шаарында жана Чүй обласунда курулууда. Ошондой эле курулуш иштери Ош, Жалал-Абад, Талас, Ысык-Көл жана Баткен облустарында да жүрүүдө.
МИКке республикалык бюджеттен бөлүнгөн каражаттар түштүк жана түндүк аймактарга тең бөлүштүрүлөт. Өткөн жылы 400 млн доллар бөлүнүп, анын 200 миллиону түштүккө, 200 миллиону түндүккө багытталган. Быйыл дагы 400 миллион доллар бөлүү пландалууда.
Мамлекет башчысынын айтымында, 2026-жылдын аягына чейин болжол менен 20 миң үй-бүлө өз батирлерине ээ болот.
