АКШ Индияга россиялык мунайды убактылуу алууга уруксат берди
АКШ Индияга россиялык мунайды сатып алууга убактылуу уруксат берди, бирок бул чара 30 күнгө гана жарактуу экенин өлкөнүн Финансы министрлиги билдирди.
Министрликтин башчысы Скотт Бессент билдиргендей, АКШнын Финансы министрлиги дүйнөлүк рынокко мунай жеткирүү үзгүлтүккө учурабашы үчүн ушундай чечим кабыл алган.
Анын айтымында, уруксат деңиздеги танкерлерде жүргөн мунайга гана тиешелүү. Ошондуктан бул кыска мөөнөттүү чара Россия өкмөтүнө чоң финансылык пайда алып келбейт.
Бессент ошондой эле Индияны АКШ үчүн маанилүү өнөктөш деп атады жана Нью-Дели келечекте америкалык мунайды көбүрөөк сатып алат деген үмүтүн билдирди.
Мындан тышкары, бул убактылуу чечим Ирандын дүйнөлүк энергетика рыногуна басым жасоо аракетинен пайда болгон чыңалууну азайтууга жардам берет деп айтылды.
Чечим АКШнын Финансы министрлигине караштуу Office of Foreign Assets Control (OFAC) тарабынан кабыл алынып, ведомствонун расмий сайтына жарыяланды.
Буга чейин Дональд Трамп Индия АКШ менен соода келишиминин ордуна Россиядан мунай сатып алууну токтотууга макул болгонун билдирген. Бирок индиялык бийлик бул маалыматты тастыктаган эмес.
Адистердин айтымында, бул чечим Ормуз кысыгы жабылып калгандан кийин мунай жеткирүүдө пайда болгон коркунуч жана мүмкүн болгон тартыштыкка байланыштуу кабыл алынган.
