Кепилдик фонд автоунаа жана ипотека боюнча 30% баштапкы взносту жаба алат
Кепилдик фонд жарандарга ипотекалык жана автокредиттер боюнча баштапкы төлөм жетишпеген учурда кепилдик берерин фонд башкармалыгынын төрагасы Малик Абакиров радио эфиринде билдирди.
Анын айтымында, буга чейин фонд негизинен ишкерлер менен иштечү, бирок кийинчерээк турак жай сатып алган жарандарды да колдоо жөнүндө чечим кабыл алынган.
Абакиров белгилегендей, ипотекалык насыя алууда банктар адатта 30% өлчөмүндө баштапкы төлөмдү талап кылышат. Мындай учурларда Кепилдик фонд ушул сумманын кепили катары чыга алат.
"Жаран алгач ипотекалык насыя алуу үчүн банкка кайрылат. Эгер банк насыяны жактырса, бирок баштапкы төлөм талап кылынса, анда Кепилдик фонддон кепилдик алууга болот. Биз бардык банктар менен келишим түзгөнбүз", — деди ал.
Анын айтымында, кепилдикти тариздөө банктын арызды кароосу менен бир учурда жүргүзүлөт жана кошумча документтерди чогултуу талап кылынбайт.
Фонддун жетекчиси бул программа мамлекеттик ипотекалык программага гана эмес, ошондой эле коммерциялык банктар берген ипотекалык насыяларга да тиешелүү экенин айтты.
Мындан тышкары, фонд ата мекендик өндүрүштөгү автоунааларды сатып алууда да кепилдик берет. Абакировдун айтымында, автокредит берүүдө банктар адатта 30% баштапкы төлөмдү талап кылышат, бул сумма да фонддун кепилдиги менен жабылышы мүмкүн.
Анын маалыматы боюнча, 2025-жылы бул программанын алкагында 158 адам автоунаа сатып алган. Ал эми быйыл жылдын алгачкы эки айында эле 60тан ашык жаран автоунаага ээ болгон.
Ошондой эле лизингдик операциялар үчүн кепилдик берүү программасын ишке киргизүү мүмкүнчүлүгү каралууда. Малик Абакировдун айтымында, банктар менен айрым маселелер макулдашылгандан кийин бул программа ишке киргизилиши мүмкүн.
