Садыр Жапаров атамекендик шприцти сатып алууну текшерүү тапшырмасын берди
Президент Садыр Жапаров Жогорку Кеңеш жыйынында шприц сатып алууларды текшерүүнү жана ата мекендик өндүрүштү колдоого көңүл бурууну тапшырды.
Жыйында депутат Айгүл Карабекова Кыргызстанда өндүрүлгөн шприцтердин мамлекеттик сатып алуулардагы үлүшү азырынча аз бойдон калып жатканын билдирди.
Президент мындан 4–5 жыл мурун мамлекет бул өндүрүштү колдогонун эске салды.
"4–5 жыл мурун министр болуп Алымкадыр Бейшеналиев иштеп турган. Ошондо биз жардам берип, пайызсыз кредит бергенбиз. Андан кийин ишкана, сыягы, бутуна туруп калды. Азыр ишкана болжол менен 500 миңге жакын шприц чыгарат, бирок анын аз гана бөлүгү ички рынокто сатылууда. Кыргызстанда сатылганы өтө эле аз. Министр, муну эске алып коюңуз. Бүгүн эле ревизия жүргүзүңүздөр — шприцтер кайдан сатып алынып жатат? Эмне үчүн өзүбүздө өндүрүлгөн продукцияны албай жатасыздар?» — деди Жапаров.
Ал бул маселеге Адылбек Касымалиев да тартылганын белгиледи.
"Мен Министрлер кабинетинин төрагасына бул маселени көзөмөлдөөнү тапшырдым. Ал азыртан эле барып, абалды текшерип жатат", — деп кошумчалады президент. Мамлекет башчысы министрликтерди жана мамлекеттик түзүмдөрдү ата мекендик продукцияга көбүрөөк көңүл бурууга чакырды.
"Бүт республика боюнча Кыргызстанда өндүрүлгөн продукцияга көңүл буруу керек. Министрликтер, депутаттар, куруучулар — баары ата мекендик өндүрүшкө басым жасашы керек", — деди ал.
