Кыргызстан ИДПсы 2030-жылга карата 32 млрд долларга жетиши мүмкүн
Кыргызстандын экономикасы туруктуу өсүштү көрсөтүп, мурда коюлган божомолдордон ашып кетиши мүмкүн экенин брифингде Экономика жана коммерция министринин орун басары Чоро Сейитов билдирди.
Анын айтымында, 2030-жылга ИДП 30 млрд доллар болот деп пландалган. Бирок алдын ала эсептөөлөр боюнча бул көрсөткүч 31–32 млрд долларга жетиши мүмкүн.
Салыштыруу үчүн айтсак, 2025-жылдын жыйынтыгы боюнча ИДП 2 трлн сомду түзүп, бул 22,5 млрд долларга барабар болгон. Ал эми жан башына эсептегенде ИДП 3 миң долларды түзгөн.
Экономиканын өсүү темпи 8,5% деңгээлинде сакталууда. Негизги өсүү факторлору төмөнкүлөр болуп саналат:
- курулуш тармагы
- кызмат көрсөтүү сектору
- өнөр жай
- транспорт
Негизги капиталга инвестициялар 18–20%га өсүүдө. Бул энергетика, саламаттык сактоо тармактарындагы ири долбоорлор жана социалдык турак жайларды массалык түрдө куруу менен байланыштуу.
Инфляция боюнча айтсак, өткөн жылы ал 9%дан жогору болгон. Учурдагы жыл үчүн максаттуу көрсөткүч 5,7% деп белгиленген, бирок бул божомол кайра каралышы мүмкүн. Бааларга тышкы факторлор — логистика, дүйнөлүк рыноктогу май менен канттын баасы сыяктуу көрүнүштөр таасир этсе, ички факторлор — аба ырайы жана эгин айдоо аянттарынын көлөмү таасир этет.
Чоро Сейитов белгилегендей, экономиканын активдүү өсүшү эмгек акы фондунун көбөйүшүнө алып келип, бул бааларга кошумча басым жаратууда. Инфляцияны кармап туруу үчүн Улуттук банк эсептик пайыздык ченди азыркы деңгээлде сактап турууну пландап жатат. Бул жарандарды көбүрөөк акча топтоого, ал эми чыгымдоону азайтууга үндөп, туруксуз мезгилде рынокту турукташтырууга жардам берет.
