МинКаб 2026-жылы эл аралык уюмдарга мүчөлүк жана үлүштүк төгүмдөргө 3,1 млрд сом жумшайт
Министрлер кабинети 2026-жылы Кыргызстан мүчө болгон эл аралык уюмдарга жана интеграциялык бирикмелерге төлөнө турган мүчөлүк жана үлүштүк төгүмдөрдүн тизмесин бекитти. Тиешелүү тескемеге 2026-жылдын 27-февралында кол коюлган.
Документке ылайык, бул максаттар үчүн 2026-жылкы республикалык бюджетте 3 млрд 107,1 млн сом каралган. Эң чоң сумма Түрк инвестициялык фонду үчүн каралган — 1 млрд 964,7 млн сом.
Мындан тышкары, ири төгүмдөр төмөнкү уюмдарга пландалган:
- Евразиялык экономикалык союз — 359,2 млн сом
- Эл аралык каржы корпорациясы — 328,8 млн сом
Ошондой эле төмөнкү уюмдарга да төгүмдөр каралган:
- Жамааттык коопсуздук келишими уюму — 77,9 млн сом
- Көз карандысыз мамлекеттердин шериктештиги органдарынын бирдиктүү бюджети — 39 млн сом
- "Борбор Азия — Кытай" форматынын катчылыгы — 38,3 млн сом
- БУУнун Контртеррордук башкармалыгы — 36,5 млн сом
- Ислам өнүктүрүү банкы — 36,3 млн сом
- КМШ мамлекеттеринин парламенттер аралык ассамблеясы — 35,7 млн сом
Мындан тышкары, 26 млн сом Көз карандысыз мамлекеттердин шериктештиги органдарынын алдында Кыргызстандын туруктуу ыйгарым укуктуу өкүлдөрүн жана өлкөнүн Жамааттык коопсуздук келишими уюмундагы өкүлүн каржылоого каралган.
Финансы министрлигине белгиленген тартипте 2026-жылкы республикалык бюджеттин каражаттарынан мүчөлүк жана үлүштүк төгүмдөрдү төлөө тапшырылды.
Тескеменин аткарылышын көзөмөлдөө Президентинин администрациясынын президенттин жана Министрлер кабинетинин чечимдеринин аткарылышын контролдоо башкармалыгына жүктөлдү.
