Салык кызматы ORIS маркасындагы мыйзамсыз тамекилерди аныктады
Мамлекеттик салык кызматынын кызматкерлери рейддик салыктык көзөмөл жүргүзүү учурунда Чоң-Капка өткөрмө пунктунда акциздик маркасы жок тамеки продукциясын мыйзамсыз алып кирүү фактысын аныкташты.
Текшерүү иш-чараларынын жүрүшүндө бир автоунаа токтотулуп, аны кароодо жүк бөлүгүндөгү жашыруун жайдан "Орис" маркасындагы 950 блок тамеки (9 500 пачка) акциздик маркасы жана коштоочу документтери жок табылган.
Бул факт боюнча материалдар жана алынган товарлар укуктук баа берүү жана тиешелүү чараларды көрүү үчүн укук коргоо органдарына өткөрүлүп берилди.
Салык кызматында эскертишкендей, акциздик маркасы жок тамеки жана алкоголдук продукцияларды сатуу жана ташуу салык мыйзамдарын одоно бузуу болуп эсептелет. Акциздик товарлардын мыйзамсыз жүгүртүлүшүн аныктоо иштери өлкө боюнча туруктуу негизде жүргүзүлүүдө.
