Эки айда КММ арзандап, кийим, турмуш-тиричилик техникасынын баасы өстү
Кыргызстанда 2026-жылдын январь–февраль айларында азык-түлүк эмес товарлардын бааларынын индекси 0,4%га жогорулап, инфляцияга кошкон салымы 0,12%дык пунктту түзгөнү статистикалык маалыматтарда айтылат.
Эң чоң өсүш кийим-кече жана бут кийим боюнча катталып, баалар 1,2%га жогорулаган. Алардын инфляцияга кошкон салымы 0,13%дык пункт болгон.
Мындан тышкары, үй тиричилик буюмдары жана турмуш-тиричилик техникаларынын баасы 2%га өсүп, инфляцияга 0,07%дык пункт салым кошкон.
Ошол эле учурда турак жай кызматтары, суу, электр энергиясы, газ жана башка отун түрлөрүнүн баасы 1,1%га төмөндөгөн. Бул категориянын инфляцияга кошкон салымы минус 0,12%дык пунктту түзгөн.
Ошондой эле күйүүчү-майлоочу материалдар(КММ) рыногунда да төмөндөө байкалган. КММдин баасы 1,9%га арзандап, инфляцияга терс таасири 0,04%дык пункт болгон. Тактап айтканда, бензин 2,1%га, ал эми дизелдик отун 2,8%га арзандаган.
Баалардын төмөндөшү декабрдын аягында орусиялык мунай иштетүүчү заводдор салттуу түрдө сунуштаган сезондук арзандатуулар, ошондой эле күйүүчү майды төмөн баада сатып алуу менен байланыштуу.
Маалыматта белгиленгендей, 2025-жылдын декабрь айында КММдин дүң баалары бир аз төмөндөп, андан кийин айрым компаниялар күйүүчү майды төмөн баада жеткирүү боюнча келишимдерди түзүшкөн. Бул партиялар Кыргызстанга келип түшкөндөн кийин, айрым май куюучу жайларда баалар 1 сомго жана андан да көпкө арзандаган.
