Кыргызстанда цементке молекулярдык маркалоо киргизилет
Кыргызстанда цементке молекулярдык маркалоо киргизүү тууралуу токтом долбоору коомдук талкууга чыгарылды. Документ продукцияны өндүрүү жана импорттоо боюнча көзөмөлдү күчөтүү, ошондой эле бюджетке салык түшүүлөрүн көбөйтүү максатында иштелип чыккан.
Долбоорго ылайык, 2026-жылдын 1-июнунан тартып өлкөдө өндүрүлгөн жана импорттолгон бардык цемент милдеттүү түрдө маркалоодон өтүшү керек. Ал эми 1-декабрдан тартып маркалоосу жок продукциянын жүгүртүүсүнө тыюу салуу пландалууда.
Молекулярдык маркер цементтин курамына кошулат жана атайын жабдуулар аркылуу анын кайдан чыкканын аныктоого мүмкүндүк берет. Бул учурда продукциянын сапаты өзгөрбөйт.
Негиздеме маалымкатында бул чара көмүскө жүгүртүүгө каршы күрөшүүгө багытталгандыгы белгиленет. Баалоолорго ылайык, системаны киргизүү легалдуу рыноктун көлөмүн эки эсеге чейин көбөйтүп, жылына кошумча 3 млрд сомго чейин салыктык киреше алып келиши мүмкүн.
Ошондой эле республикада беш ири цемент заводу иштеп жатканы, бирок алардын салык төлөмдөрүнүн деңгээли олуттуу айырмаланары айтылат. Бул өндүрүш көлөмдөрүнүн жашырылышы мүмкүн экенин көрсөтөт.
