Кытай ички рынокто бензин менен дизелдин баасын көтөрөт
Кытай бийлиги өлкө ичинде бензин жана дизелдик отундун чекене баасын жогорулатканын Кытай Эл Республикасынын Өнүгүү жана реформалар боюнча мамлекеттик комитети билдирди.
Маалыматка ылайык, 24-марттан тартып бензиндин бир тоннасынын баасы 1 миң 160 юанга (болжол менен 168 доллар), ал эми дизелдик отун 1 миң 115 юанга (болжол менен 161 доллар) кымбаттайт.
Тиешелүү өзгөртүүлөрдөн кийин аймакка жараша бензиндин бир тоннасы 10 415тен 10 855 юанга чейин (1 509дан 1 573 долларга чейин) жетет. Дизелдик отундун баасы болсо 9 460тан 9 800 юанга чейин (1 371ден 1 420 долларга чейин) болот.
Кытайда отун бааларын мамлекеттик жөнгө салуу саясатына ылайык, эгер дүйнөлүк рынокто мунайдын баасы өзгөрүп, анын таасиринен ички рынокто мунай продуктыларынын бир тоннасынын баасы 50 юандан ашык өссө же төмөндөсө жана бул абал 10 жумуш күн бою сакталса, анда бензин менен дизелдин баасы кайра каралат.
Өлкө ичинде баалар аймактарга жараша айырмаланат, анткени айрым жерлерде мамлекеттик субсидиялар каралган. Салттуу түрдө эң жогорку баалар Чэнду шаарында, ал эми эң төмөн баалар Синьцзян-Уйгур автоном районунда белгиленет.
Буга чейинки баа жогорулатуу 10-мартта жүргүзүлгөн.
