Кыргызстан ЭЭАларындагы ишканалардан бюджетке 5 млрд сомго чейин каражат түшөт
Кыргызстандагы эркин экономикалык аймактарда бүгүнкү күндө 385тен ашуун субъект иш алып барат, ал эми бюджетке жыл сайын 3–5 млрд сом өлчөмүндө каражат түшөт. Бул тууралуу радионун эфиринде Инвестициялар боюнча улуттук агенттиктин башчысы Равшанбек Сабиров билдирди.
Анын айтымында, Министрлер кабинетинин жаңы объекттерди ишке киргизүү боюнча тапшырмасынын алкагында 2024-жылы эркин экономикалык аймактарда 8ге жакын объект ачылган. Ал эми быйыл дагы 6–10 объектти ишке киргизүү пландалууда.
Равшанбек Сабиров белгилегендей, эркин экономикалык аймактарды өнүктүрүү үчүн индустриалдык парктар жана инновациялык долбоорлор да ишке ашырылууда. Май айында жумушчу топ Татарстандагы "Алабуга" экономикалык зонасынын иш тажрыйбасын изилдөөнү пландап жатат. Ошондой эле индустриалдык парктарды түзүү боюнча тажрыйбаны үйрөнүү үчүн Кытайга делегация жөнөтүлгөн.
Мындан тышкары, ал Нарын эркин экономикалык аймагы Дубайда жайгашкан дүйнөлүк эркин экономикалык аймактар ассоциациясына кошулганын билдирди.
Агенттиктин башчысы инвесторлор менен иштөө туруктуу негизде жүргүзүлүп жатканын, анын ичинде инвестициялык мыйзамдарды түшүндүрүү жана долбоорлорду сунуштоо иштери бар экенин кошумчалады.
Ошондой эле ал транспорттук инфраструктураны өнүктүрүү, анын ичинде Кытай—Кыргызстан—Өзбекстан темир жолу долбоору жана логистикалык борборлорду түзүү инвестицияларды тартууга жана жаңы жумуш орундарын түзүүгө өбөлгө болорун белгиледи.
