Кыргызстанда ЕАЭБ өлкөлөрүнөн гипсокартон импорттоого тыюу салынды
Министрлер кабинети ЕАЭБге мүчө өлкөлөрдөн гипстен жасалган плиталарды, панелдерди жана ушуга окшош, орнаментсиз, кагаз же картон менен капталган курулуш материалдарын (ТЭИ ТН коду 6809 11 000 0) импорттоого 6 айлык тыюу салганы МинКабдын документтеринде айтылат.
Белгиленгендей, бул чечим ЕАЭБ тууралуу келишимге жана Министрлер кабинети жөнүндө конституциялык мыйзамга ылайык кабыл алынган.
Экономика жана коммерция министрлигине үч күндүн ичинде Дүйнөлүк соода уюму(ДСУ) жана Евразия экономикалык комиссиясы (ЕЭК) тууралуу маалымат берүү тапшырылды. Ошондой эле Тышкы иштер министрлиги аркылуу КМШнын Аткаруу комитетине да билдирүү жөнөтүлөт.
Министрлер кабинети мындай мораторий ички рынокту колдоо жана курулуш тармагындагы соода агымдарын жөнгө салуу үчүн маанилүү экенин белгиледи.
Буга чейин Жалал-Абад облусунун Достук айылындагы гипс ташын казып алуу жана кайра иштетүүчү ишкана 2025-жылы модернизация жана жаңы өндүрүш комплексин курууга байланыштуу ишин убактылуу токтоткону маалымдалган. Убактылуу чектөөлөрдү киргизүү анын өндүрүш ишмердүүлүгүн кайра жандандыруу үчүн шарт түзөт.
