Тар жана Кара-Дарыя дарыяларынын жээктери бекемделип, дамбалар курулат — С.Жапаров
Кара-Кулжа районунун тургундары менен жолугушууда президент Садыр Жапаров айыл чарба жерлерин селден коргоо боюнча суроого жооп берди.
Кара-Гүз айылдык кеңешинин төрагасы Султанбек Абзаитов президентке кайрылып, Ылай-Талаа айыл аймагындагы Сары-Таш аймагында Тар дарыясына дамба куруу маселесин карап чыгууну өтүндү. Ошондой эле Кара-Дарыя дарыясынын жээктерин бекемдөө жана Кара-Кочкор айыл аймагындагы Биринчи Май айылынан Тоготой айылына чейин коргоочу курулуштарды салуу сунушталды.
Анын айтымында, туруктуу сел жүргөндүктөн бул аймактарда миңдеген гектар жер пайдаланылбай калууда.
Садыр Жапаров бул маселе буга чейин жыйында каралганын билдирди. Анын айтымында, Өзгөчө кырдаалдар министрлиги жыл сайын дарыялардын эки жээгине дамба куруу үчүн каражат бөлөт. Бул долбоор ишке ашса, эки тараптагы жерлерди айыл чарба айлантуусуна киргизип, дыйкандарга иштетүүгө мүмкүнчүлүк түзүлөт.
Жалпы чыгым 1 млрд 900 млн сомго бааланды.
