Кыргызстанда банктардын санынын өсүшү пайыздык чендин төмөндөшүнө шарт түзөт
Кыргызстанда коммерциялык банктардын санынын көбөйүшү банк секторундагы атаандаштыкты күчөтүп, кредиттик ресурстардын көбөйүшүнө байланыштуу, пайыздык чендердин төмөндөшүнө өбөлгө түзөт. Мындай билдирүүнү КРУБ төрагасынын орун басары Азат Козубеков журналисттердин суроолоруна жооп берип жатып билдирди.
Адистин айтымында, жаңы банктардын рынокко тартылышы атаандаштыкты күчөтүп, кызмат көрсөтүүнүн сапатын жакшыртат. Ошондой эле жарандар жана бизнес үчүн насыя, төлөм, депозит жана санариптик кызматтардын жаңы түрлөрү пайда болушуна өбөлгө түзөт.
“Эгерде рыноктун катышуучуларынын саны көбөйсө, атаандаштык да күчөйт. Жаңы түзүлгөн коммерциялык банктар учурда 1 млрд сомдон өздүк капиталын банк системасына салып жатат. Бул демекчи, бир катар кызмат көрсөтүүлөр менен бирге кредит берүү үчүн да салымын кошот. Кредиттик ресурстардын сунушунун көбөйүшү пайыздык чендердин төмөндөшүнө да өбөлгө түзөт” – деп билдирди, Козубеков.
Эске салсак, акыркы эки жыл ичинде Кыргызстандын банк системасы туруктуулугун гана эмес, өсүү потенциалын да көрсөтүүдө. 2025-жылдын аягынан бери беш жаңы банк (“Берекет Банк” ЖАК, “АФБ” ЖАК, “Асман Банкы” ЖАК, “Кылым Банк” ААК жана “Мурас Банк” ЖАК) Улуттук банктын лицензиясына ээ болгон. Ага чейинки акыркы банк 2016-жылы ачылгандыгы белгилүү.
