Кыргызстанда берилген микрокредиттердин басымдуу бөлүгү керектөө муктаждыктарына жумшалат
КРнын Улуттук статистика комитетинин маалыматына ылайык, 2026-жылдын биринчи кварталында микрокредит берүүчү уюмдар тарабынан жарандарга 23 млрд сомдон ашык суммада кредит берилди. Ал эми насыя алуучулардын саны 807 миңге жакын адамды түзгөн.
Маалыматта белгиленгендей, берилген микрокредиттердин көлөмү өткөн жылдын ушул мезгилине салыштырмалуу 23 % өскөн. Ошондой эле микрокредит алган жарандардын саны эки эседен ашык көбөйгөнү айтылды. Адистер муну кыска мөөнөттүү онлайн-кредиттердин өнүгүшү менен байланыштырууда.
Тармактык түзүм боюнча алганда, берилген микрокредиттердин эң ири үлүшү мурдагыдай эле керектөө муктаждыктарына туура келген. Бул жалпы көлөмдүн 63 % түзөт.
Мындан тышкары, айыл чарба тармагын өнүктүрүүгө берилген микрокредиттердин үлүшү 16 %дан ашык болсо, соода жана коомдук тамактануу тармагына берилген насыялар 9 %дан ашыкты түзгөн.
2026-жылдын I кварталында калкка микрокредиттердин максаттар боюнча берилиши (микрокредиттердин жалпы көлөмүнө карата пайыз менен) төмөнкүдөй:
Микрокредит алуучулардын басымдуу бөлүгү Бишкек шаарына туура келген. Тактап айтканда, насыя алуучулардын жалпы санынын дээрлик 46 % борбор калаанын тургундары болгон. Андан кийин Чүй облусу 12 %, Ош облусу 10% жакын жана Жалал-Абад облусу 9,5% менен орун алды.
Ошол эле учурда берилген микрокредиттердин көлөмү боюнча да Бишкек шаары алдыда турат. Жалпы сумманын 31% борбор калаадагы алуучуларга берилген. Ал эми Ош облусунун үлүшү 15,5%, Жалал-Абад облусу 13% жана Чүй облусу дээрлик 13% түзгөн.
