Улуттук статистика комитети статистикалык маалыматтарды башкаруунун жаңы тутумун киргизет
КРнын Улуттук статистика комитети расмий статистиканын санариптик инфраструктурасын өркүндөтүү максатында структуралык мета-маалыматтар (метадайындар) тутумун киргизүү боюнча иштерди жүргүзүүдө. 6–10-июль күндөрү комитетте эл аралык эксперт Андреа Брунинин миссиясы болуп өттү.
Миссиянын алкагында, Улуттук статистика комитетинин төрагасы Бактыбек Кудайбергенов эксперт менен жолугушуп, расмий статистиканы санариптештирүү, структуралык мета-маалыматтарды башкаруунун эл аралык стандарттарын киргизүү жана эл аралык кызматташтыкты кеңейтүү маселелерин талкуулады.
Миссиянын жүрүшүндө эксперт комитеттин адистери менен жумушчу жолугушууларды өткөрүп, структуралык метадайындар тутумун өнүктүрүү, бирдиктүү репозиторий түзүү жана эл аралык моделдерди статистикалык өндүрүшкө киргизүү боюнча сунуштарын берди.
Улуттук статистика комитетинин маалыматына ылайык, структуралык метадайындар статистикалык маалыматтарды уюштурууну бирдиктүү стандартка келтирип, маалыматтарды издөө, салыштыруу жана пайдаланууну жеңилдетет.
Бул мамлекеттик органдар, бизнес өкүлдөрү, илимий чөйрө жана эл аралык уюмдар үчүн сапаттуу жана ишенимдүү статистикалык маалыматтарды пайдаланууга кеңири мүмкүнчүлүк берет.
