Кыргызстандын экономикасы жарым жылда 11,9% өстү

2026-жылдын январь–июнь айларында Кыргызстандын экономикасында оң өсүш байкалды. Алдын ала маалымат боюнча, ички дүң продукт (ИДӨ) 960 млрд сомду түзүп, өткөн жылдын ушул мезгилине салыштырмалуу 11,9%га көбөйдү.

Улуттук статистика комитетинин маалыматына ылайык, өнөр жай продукциясынын көлөмү 450,4 млрд сомго жетип, өндүрүштүн физикалык көлөмүнүн индекси 112,7%ды түздү.

Өсүш негизинен химиялык продукцияны 2,9 эсеге, фармацевтикалык продукцияны 1,8 эсеге, жыгач жана кагаз буюмдарын, полиграфиялык продукцияны жана тазаланган мунай өнүмдөрүн 1,7 эсеге көбөйтүү, ошондой эле транспорт каражаттарын (40,7%), курулуш материалдарын (33,4%), негизги металлдарды (11,9%), тамак-аш жана суусундуктарды (8,2%) өндүрүүнүн жана пайдалуу кен казуунун (12,8%) өсүшү менен шартталды. Курулуш тармагында аткарылган иштердин көлөмү 1,7 эсеге, дүң жана чекене соода 5%га, айыл чарбасы 4,3%га өстү.

Билдирүүгө караганда, жыл башынан бери республика боюнча керектөө баалары жана тарифтер 5,5%га жогорулады. Анын ичинде азык-түлүк жана алкоголсуз суусундуктар 5,4%га, алкоголдук ичимдиктер жана тамеки 7,2%га, азык-түлүк эмес товарлар 3,3%га, кызмат көрсөтүүлөрдүн тарифтери 8,3%га кымбаттады.

Баалардын эң жогорку өсүшү Ош облусунда катталып, 12,5%ды түздү. Ал эми азык-түлүккө болгон баа эң көп Ысык-Көл облусунда өсүп, 8,9%га жетти.

2026-жылдын январь–май айларында Кыргызстандын тышкы жана өз ара соода жүгүртүүсү 6,3 млрд АКШ долларын түзүп, өткөн жылдын ушул мезгилине салыштырмалуу 1%га көбөйдү.

Ошол эле мезгилде өлкөнүн ЕАЭБге мүчө мамлекеттер менен соода жүгүртүүсү 2,4 млрд долларды түзүп, 6%га өстү. Экспорт 3,2%га азайса, импорт 8,3%га көбөйдү. ЕАЭБ өлкөлөрүнүн ичинен Кыргызстандын өз ара соодасынын негизги үлүшү Россияга (67,8%) жана Казакстанга (29,8%) туура келди.