Европа Биримдиги Кыргызстандын суу чарбасына 86 млн евродон ашык колдоо көрсөтөт
Министрлер Кабинетинин Төрагасынын орун басары – Суу ресурстары, айыл чарба жана кайра иштетүү өнөр жайы министри Эрлист Акунбеков Европа Биримдигинин Кыргызстандагы атайын жана ыйгарым укуктуу элчиси Реми Дюфло менен жолугушуп, суу чарбасы жана айыл чарба тармагындагы кызматташууну талкуулады.
Жолугушууда ирригациялык жана суу чарба инфраструктурасын модернизациялоо, сууну үнөмдөөчү заманбап технологияларды жана санариптик чечимдерди киргизүү, ошондой эле органикалык дыйканчылыкты жана климаттын өзгөрүшүнө туруктуу айыл чарбасын өнүктүрүү маселелери каралды.
Өкмөттүн басма сөз кызматынын маалыматына караганда, тараптар учурда Европа Биримдиги, Европа реконструкциялоо жана өнүктүрүү банкы жана башка европалык каржы институттарынын колдоосу менен жалпы наркы 86 млн евродон ашкан суу чарба долбоорлору ишке ашырылып жатканын белгилешти. Ошондой эле былтыр Кыргызстандын суу чарба тармагындагы реформаларды колдоого багытталган 17 млн евро гранттык келишимге кол коюлуп, аны ишке ашыруу улантылып жатканы айтылды.
Мындан сырткары, жолугушууда Кыргызстандын айыл чарба продукцияларын Европа Биримдигинин рыногуна чыгаруу мүмкүнчүлүктөрүн кеңейтүү маселеси талкууланды. Бул үчүн продукциянын сапатын жогорулатуу, лабораториялык базаны чыңдоо, эл аралык стандарттарды киргизүү жана ата мекендик өндүрүүчүлөрдүн атаандаштыкка жөндөмдүүлүгүн жогорулатуу боюнча кызматташуу улантылары белгиленди.
Жолугушуунун соңунда тараптар эки тараптуу өнөктөштүктү бекемдеп, кызматташуунун жаңы багыттарын өнүктүрүү боюнча макулдашышты.
