АИ-95 бензини бир күндө 109,9 сомго чейин кымбаттап, Бишкекте тартыштык күчөдү
Бишкекте АИ-95 үлгүсүндөгү бензиндин баасы кескин жогорулап, айрым май куюучу жайларда литри 109,9 сомго чейин жетти. Ошол эле учурда айрым түйүндөрдө күйүүчү май таптакыр жок болуп, айдоочулар арасында нааразычылык күчөдү.
Бишкек шаарындагы май куюучу жайлардын абалына сереп салсак, анын жыйынтыгы төмөндөгүдөй:
- Bishkek Petroleum май куюучу жайларында АИ-95 109,9 сомдон сатылууда;
- Red Petroleum тармагында баасы 97,9 сом;
- «Жолго» май куюучу жайларында АИ-95 таптакыр жок, анын ордуна АИ-92 (G-Drive) 83,9 сомдон сунушталууда.
Эске салсак, 2026-жылдын 25-майында Министрлер кабинети АИ-92, АИ-95, дизелдик отун жана суюлтулган газдын баасын мамлекеттик жөнгө салууга алып, импорттоочулар үчүн убактылуу субсидияларды бекиткен.
Бирок 30-июнда Россия бензин менен авиациялык күйүүчү майды экспорттоого толук тыюу салган. Андан кийин өлкөдө АИ-95 тартыштыгы күчөй баштаган.
Ал эми 7-июлда Министрлер кабинети АИ-95 бензинин мамлекеттик баа жөнгө салынуучу товарлардын тизмесинен алып салган. Натыйжада бул марканын баасы рыноктук шартта калыптанып, айрым май куюучу жайларда бир күндүн ичинде эле кескин өсүп кетүүдө.
Социалдык тармактарда жарандар АИ-95 бензининин баасынын 1 сутка ичинде 100 сомдон ашып, 109,9 сомго жетишин кескин сынга алып, анын себептерин түшүндүрүүнү талап кылышууда.
