Кыргызстанда "Бала Береке" мамлекеттик балдар депозитин киргизүү сунушталууда
Министрлер Кабинети коомдук талкууга "Бала Береке" мамлекеттик балдар депозити жөнүндө жобонун долбоорун чыгарды. Ага ылайык, бийик тоолуу жана алыскы аймактарда жашаган көп балалуу эне каза болуп калса, "Бала Береке" бир жолку төлөмүн ала албай калган учурда, анын 18 жашка чыга элек балдарынын ар биринин атына мамлекеттик депозит ачылат.
Депозитке энесине төлөнүүгө тийиш болгон каражат тең үлүштө бөлүштүрүлүп салынат. Депозиттер "Айыл Банк" аркылуу ачылып, пайыздык чени Финансы министрлиги менен Эмгек, социалдык камсыздоо жана миграция министрлиги макулдашкандан кийин белгиленет.
Ошондой эле документте "Бала ырысы" ай сайын берилүүчү жөлөкпулдун тартибине да бир катар өзгөртүүлөр сунушталууда. Алардын негизгилери:
- жөлөкпулду дайындоодо документтерди жөнөкөйлөтүү;
- чет өлкөдө төрөлгөн балдар үчүн талап кылынуучу документтерди тактоо;
- жашаган жерди "Санарип аймак" маалыматтык системасы аркылуу ырастоо;
- "Түндүк" мобилдик тиркемеси аркылуу берилген арыздарды бир жумуш күнүнүн ичинде кароо.
Мындан тышкары, долбоордо "Бала Береке" бир жолку төлөмүн берүү тартибиндеги айрым жоболор да жаңыланып, маалыматтарды мамлекеттик санариптик системалар аркылуу текшерүү жана электрондук кызматтарды кеңейтүү каралган.
Документ коомдук талкууга коюлуп, кабыл алынгандан кийин расмий жарыяланган күндөн тартып жети күн өткөн соң күчүнө кирет.
Эске салсак, Кабминдин 642-токтомуна ылайык, "Бала Береке" төлөмү Кыргыз Республикасынын жараны же кайрылман күбөлүгү бар, бийик тоолуу жана алыскы, жетүүгө кыйын аймактарда эки жылдан кем эмес туруктуу жашаган жана 2026-жылдын 1-январынан тартып төрт жана андан көп бала төрөгөн көп балалуу энелерге берилет.
